ليش كل هذا الإصرار البربري على حصار وكسر مدينة تعز ياعبدالملك الحوثي؟ وعشان ايش بالضبط ؟
عشان تحكم اليمن بالصميل؟!
وهل أصبح حكم اليمن في نظرك مسألة حصار وخنق وكسر إرادة كل مدينة ترفض مشروعك ؟
يعني مش عاجبك ان الشعبٌ اليمني كان ينتخب من يحكمه بوسائل ديمقراطية عبر الصندوق ؟ وذلحين جيت متعرر تشتي تلغي الصندوق لصالح الأعضاء التناسلية واوهام النطفة المقدسة وخرافة الحق الالهي في الحكم كما تدعي ! وتعتقد ان الشعب اليمني ممكن يقبل بهذا الاستعباد او يرضخ له .. او يتعايش معه لمجرد انك متحمل الصميل فوق روؤسنا ؟
يعني مش كافي انك تشتي السلطة بهذي الطريقة العدمية المرفوضة ؛ وفوق هذا كله عادك تشتي اليمن كلها تكون نسخة من نهجك وصرختك ومشروعك العنصري ! ومن يخالفك تقتله باعتباره عدو خالف توجيهات وتعاليم ارحم الراحمين ! او مرتزق خارج عن الملة .
طيب كم عادك تحتاج من الحروب والخراب عشان تكتشف أن الصميل قد يفرض الصمت على بعض الناس في بعض الاحيان ، ولكنه لا يصنع شرعية ، ولا يبني دولة ولا يحوّل الرفض في اي وقت من الأوقات الى
ولاء ؟!
كم عادك تحتاج ضحايا وقتلى ونازحين ومشردين عشان تواصل شرح مشروعك الدموي الكهنوتي البغيض ؛ بهذه الطريقة الإجتياحية العدائية اللي ربما كانت نافعة في العصور الوسطى اما الان مستحيل لإن احنا في القرن الواحد والعشرين .. ومش احنا في القرن الصوتي ياعبدالملك الحوثي.
كم عادك تحتاج من المجازر عشان تعرف ان اليمن ؛ ولأن وقعت في لحظة ضعف اسيرة بين يديك .. إلا انها ستظل عصية على التدجين السلالي مهما طال سياطك وامتد بقائك فيها .
كم جنازة إضافية ستحتاج في اليوم الواحد ياعبدالملك الحوثي عشان تعرف بأن كل متر في تعز تحاول إخضاعه الان بالقوة ؛ لن يطول بقائه بين يديك .. وسيذكرك بان هذه البلاد مش مزرعة ابوك .. وبان الشعب اليمني احرار ومش هم سخرة او عبيد عند ابو احد .. وان اليمن دولة عريقة أكبر من أن تختصر في سلالة .. أو ان تحكم بالصميل لو ما بقى فيها راس .