وليش لأ؟
فين بيلاقوا أحسن وأبشت مني في شؤون النقل يالول
وهذي سيرتي الذاتية تشهد:
-نقلت في أول عشر سنين من حياتي انا وامي وخواتي داخل بيت جدي بس يجي ثمان نقلات من الدور النازلي للدور الطالعي ومن الطالعي للنازلي
-نقلت في العشرينية الثانية انا وامي وخواتي وايتام خالي من بيت جدي، الى ستة بيوت اكتريناها تنقلنا بينهن بيتا بيت من حارة الى حارة
- نقلت العفش والقلافد من فوق دباب لافوق دباب، مناقله من بيت لا بيت ومن حارة الى حارة والسؤال نفسه أين سارحين؟ والجواب نفسه : عننقل
- في العشرية الثالثة تزوجت قلت شستقر تنبعت في خمسة بيوت مناقله من زوه لزوه وكانت الهواتف في قائمة المفضلة بجوالي ارقام اصحاب الدينات
- في العشرية الرابعة من عمري بلغت سن الرشد في بيتين منفصلين واحد اكتريته لي والثاني لامي
اثثت البيتين مما جميعه وكنت حينها اشتغل وحالي مستور وقلت خلاص استقرينا وتعبنا نقوله وماعد شنقل انا وامي إلا لاداخل بيتي لما يفتح الله واعمر
لكن الحلم تعثر بعد ان قرحت الحرب اللعينة وبدأت النقولة الحقيقية على اصولها
نقلت من الجحملية الى شرجب نازح على بال ما تتوقف الحرب ونرجع
البيت
لكن الحرب طولت وتعرضت البيوت في حارتنا للنهب نونقلت ماتبقى من العفشين حقي وحق امي من الحارة في مدينة تعز الى دكانين اكتريتهن في مدينة القاعدة
طالت الحرب اكثر وضاق حالي ؛ ونقلت من شرجب الى صنعاء شستقر ونقلت العفش من القاعدة الى صنعاء
- تنقولت في بيتين داخل صنعاء
نقلت العفش اليهما مرتين
تأزمت الاوضاع السياسية في صنعاء بعد مقتل الزعيم ونقلت هاربا من صنعاء الى عدن
ونقلت العش بعدي
وفي عدن تنقلت انا والعفش في بيتين
وضاق بي الحال في عدن ونقلت منها الى تعز
ومازالت وعملية المناقلة مستمرة الى اليوم.
هيا كيف تشوفي يالول ؟
استحق اكون وزير نقل او ماشي ؟
- إلا تستحق ياضاك
مله ايحين ؟ شاموت وانا اناقل ومابو خبر
اصبر ياضاك مو معك للعجل
وإن مت قبل اعلان تشكيل الحكومه وما عينوك وزيرا للنقل شيسموك مع الوقت الشهيد المناقل / فكري قاسم
#سوا_لاهي_اكه
.....................
منشور قديم ذكرني به الفيس بوك اليوم وقلت خينا شتسبر