الرئيس هادي ضيع اليمن وضيع الدولة لانو بعدما مسك السلطة في صنعاء بدأ شوية شوية ينسى انو رئيس اليمن، وتلبسه شعور انو جنوبي في عاصمة شمالية، ضيف معزز مكرم،
او زيما تقل "هجرة"،
لا حد يغثيه
لا احد يزعله عشان الوحدة، عشان لا يحنق ويسير عدن،
لوما جاء المعتوه الحوثي نفض الكل لا همه جنوب ولا وحدة ولا امم متحدة ولا مجتمع دولي.. وختمها براس صالح.
العليمي جاء بعد هادي،
ولا عاد به عاصمة ولا دولة ولا بلاد، بس تم تقديمه في خطاب موازي غير رسمي على أنو يمثل حصة تعز في الحكم، وفق منطق انو ذلحين دورنا نحكم، باعدوا من طريقنا،
حكم ايش ومافيش بلاد؟
مدري.
المهم.. لا حد يتكلم عن رشاد بسوء عشان ما يجرح تعز، قولوا فخامة الدكتور، صفقوا له، شجعوه بالمليح والبطال،
خلوه يلعب مع الجهال عافاكم،
ايش دخل تعز بالموضوع؟
مدري.
طيب تعز بلادنا واليمن بلادنا وعزها عز لنا،
او كيف!
تقل له مش وقت نسويات، معنا معركة وغبار اغبر، يقلك لااا هذا تمكين للمرأة.
العليمي تعز وتعز الدولة الرسولية التي مكنت المرأة، انتم ما تفهموا،
ويكلموك عن الأميرات الدار شمسي، والدار نجمي، وماء السماء، ولؤلؤة، واختيار الدين، وجهة الطواشي ودار الاسد،
وانهن بنين مدارس ومساجد ووقفيات.
اهاااا..
يلا بالخير،
اليمن قد ضاعت وطارت ملح،
الله يعين الجيران بس ويلطف بهم